stofustáss eða snobb

Eiginmaður minn er voða liberal þegar kemur að flest öllu nema "snobbinu" í mér. Ég kalla þetta að sjálfsögðu ekkert annað en góðan smekk og alls ekkert snobb og tel mig yfir höfuð mikinn fagurkera eins og dömurnar 3 í Innlit útlit myndu orða það. Eftir þessa stuttu dvöl mína hér í Danmörku hefur þetta bara versnað ef eitthvað er. Danir eru náttúrulega þekktir fyrir allt annað en lummulegheit og teljast til smekklegri þjóða þegar kemur að hönnun. Ég dró Styrmi með mér í eina svona mublubúð um daginn og benti honum á hvaða hlutir gætu sem dæmi gert fínu stofuna okkar enn fínni. Hann var ansi hrifinn bara - prófaði hina og þessa stóla en hjá mér voru aðeins 2 á óskalistanum. Já honum fannst þeir líka bara nokkuð flottir.....þangað til hann leit á verðið. Eiginmaðurinn gat engan veginn sannfærst þrátt fyrir feiknagóða söluræðu (ég hefði hins vegar bókað fengið vinnu á staðnum ef gaurinn hefði skilið íslensku). Verðmiðinn var verðmiði á allt öðru en stólum að hans mati og ég get svo sem verið sammála því (að einhverju leiti). Þegar ég svo minntist á að húsgögnin bæru nöfn, svo merkileg þau væru, þá var honum öllu lokið. Húsgögn heita ekki nöfnum eins og egg eða svanur fékk ég að heyra - heheh já þar hrundi söluræðan.
Við áttum sem sagt skemmtilegan dag í Olsens möbler eða hvað búðin nú hét og vorum alls ekki svo sammála, eins og fyrri daginn.

Ég lét mér því nægja að fara á einn loppemarkað í staðinn og festa kaup á krúttlegum litlum forstofu kolli fyrir heilar 100 kr. og eftir að hafa sett hann í nýtt dress lítur hann hreint ekkert verr út en hver önnur sessa (eða þannig). Kallinum finnst það alla veganna - listfrömuðinum mikla.