Gleðilegir páskar

Ma, pa og Be skelltu sér yfir hafið og voru hjá okkur yfir páskana. Tíminn leið náttúrulega alltof hratt og þau voru farin aftur áður en maður vissi af. En við náðum nú samt að gera ýmislegt. Crazy-An hafði nefnilega setið yfir plani nokkur kvöld áður en þau mættu á svæðið og því var ýmislegt gert til skemmtunar.

Við héldum smá afmæliskaffi þar sem afi gamli var látinn blása á 50 kerti, fórum í dýragarð, í Bakken, gengum um Íslendingaslóðir undir leiðsögn Guðlaugar Arasonar og fórum til frændfólks okkar í Svíþjóð svo eitthvað sé nefnt. Það var gaman eins og alltaf að koma til Håssleholm. Eins og á 5 stjörnu hóteli - uppábúin rúm fyrir alla og matseldin -ekki út í hana.

Held við höfum étið stanslaust í heilan sólarhring.

Við fengum líka páskasendingu frá báðum ömmu og afa settunum. Páskar eru náttúrulega ekki páskar án páskaeggja. Málshættirnir voru góðir í ár.

"Flest verður nýtnum að notum" - mikið sannleikskorn í þessu - Ég túlkaði málsháttinn mér í hag. Söfnunarárátta mín hefur notagildi á endanum. Við hjónin erum nefnilega ekki sammála um notagildi hluta sem ekki hafa verið notaðir í einhvern tíma. Styrmir segir alltaf henda en ég geyma.

"Ekki eru allar ferðir til fjár þótt farnar séu" - Við erum einmitt stödd í einni slíkri - ekki til fjár, alla veganna ekki eins og er en örugglega til mikillar lífsreynslu fyrir okkur öll.

"Allt sem þú þarft í lífinu er þekkingarskortur og sjálfstraust" Hehe góður og ekki svo vitlaus. Hverjum líður betur en litlu barni sem er fullt sjálfstrausts og hefur ekki glóru um allt það sem skekur heiminn.